बेलझुण्डीमा जारी फुटबल प्रतियोगिताको उपाधिका लागि राप्ती र टरिगाउँ बी भिड्दै

दाङ ।  दाङको तुलसीपुर १८ बेलझुण्डीमा  जारी सुसेली फुटबल प्रतियोगिताको शनिबार फाइनल खेल हुँदैछ । विजयीका लागि फाइनलमा राप्ती क्लब र टरिगाउँ युवा क्लब ( बी ) ले प्रतिस्पर्धा गर्नेछन् । जेठ २९ गतेदेखि सुरु भएको प्रतियोगिता अन्तर्गत टरिगाउँ युवा क्लब ( ए ) लाई हराउँदै राप्ती क्लबले फाइनलको यात्रा तय गरेको थियो । शुक्रबार भएको पहिलो खेलमा राप्ती क्लबले ३-० गोल अन्तरले टरिगाउँ युवा क्लब ए लाई हराउँदै फाइनल यात्रा गरेको हो ।

यस्तै दोस्रो सेमिफाइनल खेल जित्दै टरिगाउँ युवा क्लब ( बि ) ले दुधरास युवा क्लबलाई फराकिलो गोल अन्तरले राप्ती युवा क्लब सँग फाइनलका लागि भेट पक्का गरेको छ । टरिगाउँ युवा क्लब ( बि ) ले दुधरास युवा क्लबलाई ७-० गोल अन्तरले राप्ती क्लबसँग फाइनलमा भेट पक्का गरेको हो । तुलसीपुर १८ मा रहेको सुसेली युवा क्लबको आयोजनामा प्रतियोगिता सुरु भएको हो ।

फाइनल खेल शनिबार दिउँसो ३ बजेदेखि सुरु हुने आयोजक क्लब सुसेली युवा क्लबका अध्यक्ष रोहन पुनले जानकारी दिए । प्रतियोगितामा बिजयी हुने फुटबल टिमले नगद ५० हजार, कप र मेडल प्राप्त गर्ने छ । यस्तै दोस्रो हुने टिमले नगद २० हजार, कप र मेडल प्राप्त गर्ने अध्यक्ष पुनले जानकारी दिए ।