४ दिनको अवधिमा २२ हजार बढि विद्यार्थीलाई खोप प्रदान

दाङ । तुलसीपुरमा  बिहीबार सम्म २२ हजार ४३१ जना विद्यार्थीहरूलाई कोरोना विरुद्धको मोडर्ना खोप प्रदान गरिएको छ ।  त्यस्तै बुधबार  १ हजार २१२ जना विद्यार्थीलाई मोडर्ना खोप प्रदान गरिएको उपमहानगरको फोकल पर्सन  विमल केसीले जानकारी दिए  ।

 उनका अनुसारमा  तुलसीपुरमा हालसम्म १२ देखि १७ वर्ष सम्मका २२ हजार ४३१ जना विद्यार्थीहरूलाई  खोप प्रदान गरेको छ ।  त्यस्तै बिहीबार २० गते वार्ड नं ८ , ११ , १२  का विद्यालयमा  खोप लगाउने कार्यक्रम रहेको उनले जानकारी दिए ।  

त्यसैगरी राप्ती प्रादेशिक अस्पतालमा  विदेश जाने पासपोर्ट र भिसा कागजात भएका ९५ जनालाई जोन्सन खोप लगाइएको समेत उनले बताए ।  यसैगरी उपमहानगरमा हालसम्म कुनै पनि खोप नलगाएका १६८ जनालाई कोभिसिल्ड  पहिलो खोप र १२ जनालाई  अतिरिक्त खोप प्रदान गरिएको फोकल पर्सन केसीले जानकारी दिए । 

बिहीबार  राप्ती प्रादेशिक अस्पताल र मेट्रो अस्पताल बाट हाल सम्म कुनै पनि खोप नलगाएका व्यक्तिहरूलाई कोभिसिल्ड खोप लगाउने कार्यक्रम रहेको उनको भनाइ छ । त्यस्तै तुलसीपुरमा थप ४ जनामा कोरोना संक्रमण पुष्टि भएको छ । ति मध्य २ जना विद्यार्थीहरू रहेका छन् । 

तुलसीपुरमा हाल १९६ जना कोरोनाका सक्रिय  संक्रमितहरु रहेका छन्, भने ५७० जना निको भएका छन् । त्यस्तै गत पुस १८ देखि हाल सम्म २ हजार १६७ जनाको कोरोना परीक्षण गर्दा ७६७ जनामा कोरोना संक्रमण पुष्टि भएको थियो, भने एक जनाको मृत्यु भएको छ ।