दाङमा १४ जनामा कोरोना संक्रमण पुष्टि, ३९ जना संक्रमणमुक्त १ जनाको मृत्यु

दाङ । दाङमा सोमबार पनि कोरोना संक्रमित थपिनेभन्दा निको हुनेको संख्या बढि देखिएको छ । जिल्ला आपतकालीन कार्य संचालन केन्द्रले आज दिउँसो ३ बजे दिएको जानकारी अनुसार जिल्लामा १४ जनामा संक्रमण देखिदा ३९ जना संक्रमणमुक्त भएका छन् । गएको २४ घण्टामा ८० जनामा परिक्षण गर्दा ५ महिला र ९ पुरुषमा कोरोना देखिएको केन्द्रले जनाएको छ ।

आज थपिएका १४ जना सहित जिल्लामा बैशाख यता संक्रमित हुनेको संख्या ७ हजार ७ सय २० पुगेको छ । अहिले जिल्लाका अधिकांश संक्रमित होमआईशोलेसनमा बसेका छन् । जसमा १ सय ९८ जना होमआईशोलेसनमा, सामान्य उपचारमा ४३ जना रहेको छन भने आईसियुमा १५ जनाको उपचार भईरहेको छ । जिल्लामा अहिले सक्रिय संक्रमितको संख्या २ सय ५६ मा झरेको छ । त्यस्तै आज निको भएका ३९ जनासँगै जिल्लामा बैशाख यता निको हुनेको संख्या ७ हजार २ सय ६६ पुगेको केन्द्रले जनाएको छ ।

दाङमा गत २४ घण्टामा एक जना कोरोना संक्रमितको मृत्युभएको छ । जिल्ला आपतकालिन कार्यसंचालन केन्द्र घोराहीले सोमबार दिउँसो ३ बजे दिएको जानकारी अनुसार तुलसीपुर उपमहानगरपालिका वडा नम्बर ९ का ६० वर्षिय पुरुषको मृत्यु भएको हो । उनको कोरोना विशेष अस्पताल बेलझुण्डीमा उपचारको क्रममा मृत्यु भएको हो । उनमा गत जेठ २७ गते कोरोना संक्रमण पुष्टि भएको थियो । आज मृत्युभएका एकसहित जिल्लामा बैशाख यता कोरोनाबाट मृत्यु हुनेको संख्या १ सय ९८ पुगेको केन्द्रले जनाएको छ ।