बैतडीमा जिप दुर्घटना हुँदा ६ जनाको मृत्यु

बैतडी । बैतडीमा जिप दुर्घटना हुँदा ६ जनाको ज्यान गएको छ । सोमबार राति चट्टयाङ लागे मृत्यु भएका वडा सदस्यको शव पोष्टमार्टमा लागि लिएर जिल्ला अस्पताल बैतडी आउदै गरेको जिप जिल्लाको पञ्चेश्वर गाउँपालिका वडा नं. ६ को गणमेश्वरमा दुर्घटना हुँदा चालकसहित ६ जनाको मृत्यु भएको जिल्ला प्रहरी कार्यालय बैतडीका प्रहरी प्रवक्ता, प्रहरी निरीक्षक दर्शन खडकाले जानकारी दिए ।

उनका अनुसार मृत्यु हुनेमा जीप चालक दशरथचन्द नगरपालिका वडा नम्बर ४ का करिब ४१ बर्षीय तेज बहादुर बोहरा, पञ्चेश्वर गाउँपालिका वडा नं ६ का बर्षीय जीतसिंह भण्डारी, डम्मरसिंह भण्डारी, हिम्मत भण्डारी, दीपक भण्डारी र सोही ठाँउका खेम भण्डारी रहेका छन । ४ जनाको घट्नास्थलमै मृत्यु भएको र चालक र खेम भण्डारीको उपचारका लागी अस्पताल लैजादै गर्दा मृत्यु भएको हो ।

घाईते हुनेहरुमा पञ्चेश्वर ६ कै हरिश सिंह भण्डारी, मोहन सिंह भण्डारी, दिलिप सिंह भण्डारी, मदन सिंह भण्डारी र गोर्या सिंह भण्डारी रहेका छन । जीपमा ११ जना सवार रहेको बुझिएको छ । घाईतेहरुको जिल्ला अस्पताल बैतडीमा उपचार भईरहेको छ । से १ ज १८३ नं को जिप मंगलबार दिउसो दुर्घटनामा परेको हो । जीप सडकबाट झण्डै ५ सय मिटर तल खसेको प्रहरीले जनाएको छ ।