दाङमा एकैपटक ९ वटा पुल बन्ने
दाङ । विकासका पूर्वाधारबाट पछि परेको जिल्लाको पश्चिमी क्षेत्रमा एकै पटक ९ वटा पुल निर्माण हुने भएका छन्। आर्थिक वर्ष ०८०/८१ मा पुल निर्माणका लागि ८ करोड रकम विनियोजन गरिएको छ।
लुम्बिनी प्रदेश सरकारका अर्थमन्त्री धनबहादुर मास्कीले चालु आवका लागि जिल्लामा ९ वटा पुल निर्माण गर्ने योजनासहित बजेट विनियोजना गरिएको जानकारी दिए। उनका अनुसार रिम, तिनतले र भाँगाबार खोलामा बेलीबृज निर्माणका लागि ५० लाखका दरले बजेट विनियोजन गरिएको छ।
ट्वाङखोलामा डिपिआरसहित पक्की पुल निर्माणका लागि एक करोड ५० लाख, पुरन्धारा हुँदै मलै जाने सडकअन्तर्गत बबई नदीमा डिपिआरका लागि १५ लाख तथा बखरीया–सरुवाडाँडा–गोल्टाकुरी–कालितारा सडकमा पुल निर्माणका लागि एक करोड २५ लाख बजेट छुट्याएको मन्त्री मास्कीले जानकारी दिए।
उनका अनुसार तुलसीपुर–हापुर जोड्ने सडकअन्तर्गत तुलसीपुर–१ भमके खोलामा पुल निर्माणका लागि एक करोड, शान्तिनगर–३ पातेटाकुरा खोलाका लागि ७५ लाख, बौलाखोला माथिल्लो बाटोमा पक्कीपुल निर्माणका लागि एक करोड र बबई गाउँपालिकाअन्तर्गत राजीखरे खोलाका लागि ७५ लाख बजेट विनियोजन भएको छ।
दाङको कर्णालीका रुपमा चिनिने गङ्गटे सडकअन्तर्गत हापुरे–गङ्गटे खण्डका विभिन्न खोलामा ३ पुल निर्माण हुन लागेका छन्। यसअघि यस खण्डमा पुल नहुँदा वर्षातका समयमा आवतजावत ठप्प हुने गरेको थियो।थाहा खबरबाट…
