दाङमा ट्याक्टर दुर्घटना हुँदा सहचालकको मृत्यु

दाङ । दाङमा ट्याक्टर दुर्घटना हुँदा सहचालकको मृत्यु भएको छ । दंगीशरण गाउँपालिका ६ का १७ बर्षीय सुदीप चौधरीको मृत्यु भएको छ । चौधरी रा १ ब ४५३३ नम्बरको ट्याक्टरको सहचालक हुन ।

उक्त ट्याक्टर दंगीशरण ३ बबई नदीको एकलीबाट ढुँगा बोकेर सिमठानातर्फ जाँदै गरेको थियो । तीब्र गतिको ट्याक्टर अनियन्त्रित भइ सोमबार राति ८ बजेतिर दुर्घटनामा परेको इलाका प्रहरी कार्यालय तुलसीपुरले जानकारी दिएको छ ।

दुर्घटनाका गम्भीर घाइते चौधरीलाई उपचारका लागि तुलसीपुरस्थित राप्ती प्रादेशिक अस्पतालमा ल्याएकोमा चिकित्सकले मृत घोषणा गरेका थिए । चालक र ट्याक्टर बागर प्रहरीको नियन्त्रणमा रहेका छन् ।