मेट्रो कलेजका विद्यार्थीले पुष्प खेतीबाट चार लाख आम्दानी गरे

तुलसीपुर । तुलसीपुर उपमहानगरपालिकाले सञ्चालनमा ल्याएको मेट्रो कलेजमा अध्ययनरत विद्यार्थीले पुष्प खेतीबाट चार लाख रुपियाँ आम्दानी गरेका छन् । विद्यार्थीले प्रयोगात्मक अभ्यासअन्तर्गत पढ्दै–कमाउँदै कार्यक्रम अन्तर्गत कृषि वन विज्ञान विषय पढ्ने विद्यार्थीले पुष्प खेतीबाट सो आम्दानी गरेका हुन् ।

क्याम्पसको पाँच कठ्ठा जग्गामा गरिएको खेतिबाट विद्यार्थीले चार लाख आम्दानी गरेका हुन् । विद्यार्थी सन्दीप मल्लले बजारको मागअनुसार सयपत्री र मखमलीका पुष्प पु¥याउन नसकिएको बताए । बजारको माग अत्यधिक भए पनि मागअनुसार बजारमा पुष्प पुगाउन नसकिएको बताए ।

क्याम्पस प्रमुख वसन्त आचार्यले विद्यार्थीलाई किताबमा मात्रै सीमित नराखी, पढाइमा समेत टेवा पुगोस् भन्ने लक्ष्यले पुष्प व्यवसायमा जोडेको बताए । विद्यार्थीले आफै बिरुवा उत्पादन गरेर फूलखेती गरेको शिक्षक घनश्याम केसीले जानकारी दिए । लक्ष्यअनुरूप नै पुष्प व्यवसायबाट आम्दानी भएको बताउँदै दुई लाख रुपियाँको फूल बिक्रीका लागि तयारी भएको जानकारी दिए ।

मखमली र सयपत्री फूलको विद्यार्थीले किलोमा ६ सय र प्रतिमाला दुई सय ५० रुपियाँ सम्ममा बिक्री गरेको विद्यार्थी शुभेच्छा पौडेलले जानकारी दिए । अब कलेजले विद्यार्थीलाई पुष्प खेतीसँगै अन्य कृषिजन्य वस्तुको उत्पादनमा समेत संलग्न गराइने क्याम्पसका प्रमुख वसन्त आचार्यले बताए ।

प्रकाशित मिति : २०७९ कार्तिक १७ गते बिहिवार
प्रतिक्रिया दिनुहोस