युवती मृत फेला

रोल्पा । रोल्पामा एक युवती मृत फेला परेकी छन् । मंगलबार बिहान ७ः३० मा सदरमुकाम लिवाङस्थित घरेलु तथा साना उद्योग कार्यालयमा १९ वर्षीया कृष्णी कामीलाई मृत फेला पारिएको प्रहरीले जनाएको छ ।

प्रहरीका अनुसार दक्षिण रोल्पाको रुन्टीगढी ५ छिन्नेटा निवासी ती युवती घरेलु तथा साना उद्योग विकास समितिको आयोजनामा संचालित ब्युटी पार्लर सम्बन्धी तालिममा भाग लिन आएकी थिइन् । उनी उक्त कार्यालयको आवास घरमा बस्दै आएकी थिइन् । उनी सुतेको कोठामा बिहानसम्म ढोका नखोलेको सूचना पाएपछि प्रहरीको सहयोगमा ढोका खोल्दा कृष्णीलाई मृत अवस्थामा भेटाइएको हो ।

घटनाको जानकारी पाएपछि कृष्णीका बुबा भूपलाललाई बोलाइएको थियो । ती युवतीले केही महिना अघिसम्म त्रिवेणी गाउँपालिका ७ मा रहेको सामुदायिक रेडियो पल्लवीमा काम गर्थिन् । प्रहरीका अनुसार उनी सुतेको कोठामा सर्पसमेत भेटिएको थियो । उनको हातमा घाउ पनि देखिएकाले सर्पले टोकेको हुन सक्ने प्रहरीको प्रारम्भिक अनुमान थियो ।

रोल्पा अस्पतालमा शव पोस्टमार्टम गर्दा सर्पले टोकेको कारण मृत्यु भएको प्रहरी प्रमुख प्रहरी नायव उपरीक्षक विनोद घिमिरेले बताए ।