तुलसीपुर खानेपानी संस्थाको निर्वाचन तालिका सार्वजनिक

दाङ । तुलसीपुर खानेपानी उपभोक्ता तथा सरसफाइ संस्थाको निर्वाचन आउँदो पुस १७ गते हुने भएको छ । निर्वाचन समितिले एक सूचना प्रकाशित गर्दै आउँदो पुस १७ गते निर्वाचन हुने जनाएको छ । जस अनुसार शुक्रवार मतदाताहरूको नामावली प्रकाशन, मंसिर २७ गते दिउँसो ३ बजेसम्म मतदाता नामावली उपर दावी विरोध गर्न सकिने निर्वाचन समितिले जनाएको छ ।

निर्वाचन समितिका अनुसार आँउदो पुस ११ गते दश बजेदेखि दिउँसो ३ बजेसम्म उम्मेदवारहरूको मनोनयन पत्र दर्ता गर्ने र बेलुका पाँच बजेसम्म उम्मेदवारी नामावली प्रकाशन, पुस १२ गते ११ बजेसम्म उम्मेदवारको नामावली उपर दावी विरोध , सोही दिन चार बजे उम्मेदवारहरूको संशोधित नामावली प्रकाशन, १४ गते ११ बजेसम्म उम्मेदवारहरूको नामावली फिर्ता लिन सकिने र बेलुका पाँच बजेसम्म उम्मेदवारहरूको अन्तिम नामावली प्रकाशन गरिने छ ।

पुस १५ गते दिउँसो १२ बजेसम्म उम्मेदवारहरूलाई चुनाव चिन्ह प्रदान गरिने र १७ गते बिहान साढे सात बजेदेखि बेलुका साढे चार बजेसम्म मतदान हुने निर्वाचन समितिले जनाएको छ । मतदान सम्पन्न भए लगतै मतगणना सुरु हुने समितिले जनाएको छ ।