रोल्पा बस दुर्घटना अपडेट: चारै जनाको सनाखत

दाङ । बिहीबार साँझ रोल्पा भएको बस दुर्घटनाका मृतक चार जना सबैको सनाखत भएको छ । दुर्घटनामा परि बसका चालक रोल्पा परिवर्तन गाउँपालिका ५ का ४० वर्षीय बिरमान बूढा, परिवर्तन गाउँपालिका ६ का ५० वर्षीय कुमार पुन, परिवर्तन गाउँपालिका १ का २९ वर्षीय दीपक रोका र त्रिवेणी गाउँपालिका ४ की १८ वर्षीया पुष्पा घर्ती मगरको मृत्यु भएको जिल्ला प्रहरी कार्यालय रोल्पाले जानकारी दिएको छ ।

दाङको घोराहीबाट थवाङका लागि छुटेको ना ३ ख ५५१८ नम्बरको यात्रु बहाक बस बिहीबार पौने ६ बजेतिर रोल्पाको माडी गाउँपालिका ४ तार्केवाङ नजिकै दुर्घटना हुँदा चारजनाको घटना स्थलमै मृत्यु भएको थियो । प्रहरीका अनुसार दुर्घटना परी १९ जना घाइते भएका छन् ।

घाइते मध्ये एक जनाको अवस्था गम्भिर रहेको छ । रोल्पाको परिवर्तन गाउँपालिका २ की २१ वर्षीय अनिता बोहरा गम्भिर घाइते भएको जिल्ला प्रहरी कार्यालय रोल्पा प्रहरी निरीक्षक एवं प्रवक्ता कृष्ण रानाले जानकारी दिए । उनका अनुसार घाइते मध्य ५ जनाको भैरहवा मेडिकल कलेजमा उपचार भइरहेको छ ।

त्यस्तै अन्य ११ जनाको रोल्पा जिल्ला अस्पतालमा र ३ जनाको घर्तीगाउँ स्वास्थ्य चौकीमा उपचार भइरहेको प्रहरीले जनाएको छ । बस सडकदेखि करिब एक सय फिट तल खसेको प्रहरीले जनाएको छ । बाटो साँघुरो र अप्ठेरो हुँदा दुर्घटना भएको हुन सक्ने प्रहरीले अनुमान गरेको छ ।