सडक निर्माणको क्रममा झरेको सुख्खा पहिरोले स्काभेटर पुरियो

दाङ । सडक निर्माणको क्रममा झरेको पहिरोले स्काभेटर पुरिदा राप्ती लोकमार्ग अन्तर्गत दाङ सल्यान सडक खण्ड अवरुद्ध बनेको छ । हिजो बेलुकी साढे सात बजे सल्यानको कपुरकोट ३ चोरखोला नजिक छाँगामा सडक निर्माण गर्दै गर्दा माथीबाट सुख्खा पहिरो झरेर बा २ क ८०७७० नम्बरको स्काभेटर पुरिएको थियो ।

अहिले उक्त सडक खण्ड पूर्ण रुपमा बन्द रहेको प्रहरीले जनाएको छ । दुर्घटनाबाट स्काभेटर अपरेटर हिमनाथ योगी सामान्य घाइते भएका छन् । पहिरो संगै झरेको ठूला ठूला ढुंगाले स्काभेटरलाई च्यापेको छ । निकै जोखिमयुक्त स्थान भएकाले स्काभेटर निकाल्न र पहिरो पन्छाउन समस्या भइरहेको प्रहरीले जनाएको छ ।

पहिरो झरेको स्थानमा अर्काे एउटा स्काभेटर भएपनि त्यसबाट सडकको अवरोध हटाउन नसकिएकोले दाङबाट अर्काे स्काभेटर लगेर पहिरो हटाउने प्रयास भइरहेको बताइएको छ । आज दिउँसो सम्ममा सडक सञ्चालनमा आउन सक्ने प्रहरीको भनाई छ ।